عروس وحكَة فلوس

المنار / منار الزبيدي

هذا العرض الأخير الي صار حديث الناس بالفترة الاخيرة بس مو اي عروس .. اقصد العروس الي مستضعفها و محاربها المجتمع
العروس ” الارملة” الي مات زوجها وظلت محتارة شلون تعيش اطفالها ..
العروس الي بحاجة فرصة عمل حتى تعتمد على نفسها وتعيش عيشة كريمة وتكبر اولادها وتعلمهم وتهتم بيهم ..
العروس الي صارت وسيلة لكسب تعاطف الرجال من خلال اعلان لتزويجيها ووياها خمس ملايين
لا تستغربون لان بالوقت الي ننتظر بي تشريع منصف يدعم المراة ويشد على ايدها للاسف نشوف تحضيرات تم تسويقها للاعلام تحث الرجال على تعدد الزوجات بشرط تكون الزوجة الثانية أرملة والهدية مبلغ خمس ملايين والجريمة انو اذا صار طفل هم ياخذون عليه فلوس !!
يعني الدول الي تهتم بشعبها تنظم الانجاب والزواج وتشرع قوانين تحترم انسانية شعبها وتكفل وتضمن حقوق كل فرد وحتى الحيونات هم تضمن حقوقها
واحنا نفكر ب”التزويج” مقابل ” حكَة فلوس” ونسلع ب ” الأرامل ” بس مانعرف ورة هالفكرة العظيمة شنو ممكن يكون!! كم أرملة راح يستغلها معدوم الضمير وكم ظالم راح يستغل الأرامل! وشنو ذنب الطفل الي ينولد علمود ياخذون فلوس براسه!!
زين منو تقبل زوجها يتزوج عليها ؟؟ يعني كم اسرة راح تتفكك وكم زواج راح يخرب!!
لو كانت الغاية حل مشكلة الزواج وتطوير المجتمع لكان المقترح منظم موضوعي وبوقت مناسب و يشجع الشباب غير المتزوجين بدل ما يسيئون لنفسهم والمجتمع ان يبنون نفسهم من خلال قروض ومشاريع عمل بالتالي الشاب يفكر بالزواج والاستقرار الاجتماعي ،
اما تجينا جاهلية المجتمع وتقترح بمنتهى الوقاحة بيع الأرامل فهاي جريمة بحق الانسانية بشكل عام والمرأة بشكل خاص وهالشي انتهاك وتجريح لكرامة المراة العراقية ،
المهم امس كان احد الموظفين يسولف ويا زميله بصوت عالي حتى يسمعون ” أرملة ” موظفة وياهم يكولة تريد العروس ووياها حكَة فلوس وكانت ضحكتهم عالية بكد الحزن والانكسار الي شفته بعيونها!!

Exit mobile version